PDF, JPG, o PNG: Aling format ang dapat gamitin sa na-scan na dokumento?

May form na humihingi ng JPG, pero tatlong pahina ang dokumento mo. O baka kailangan mong maglagay ng isang pahina sa slide, pero PDF lang ang hawak mo. Nakadepende sa susunod na paggagamitan ng dokumento ang tamang output format.

Piliin ang PDF para manatiling magkakasama ang mga pahina. Piliin ang JPEG kung kailangan mo ng magkakahiwalay na image ng bawat pahina na karaniwang mas maliit ang file. Piliin ang PNG kung gusto mo ng image ng bawat pahina na walang lossy compression. Kung may format na hinihingi ang tatanggap, iyon muna ang sundin.

Sa Look Scanned, puwedeng i-save ang na-scan na dokumento sa tatlong format. Kapag nag-export ka bilang image, mada-download ang isang ZIP na may tig-isang image para sa bawat pahina. Subukan muna ang mga option gamit ang built-in na halimbawa bago pumili ng sarili mong file. Buksan ang Look Scanned

Piliin ang format ayon sa paggagamitan

Dalawang tawag lang ang JPG at JPEG sa iisang image format. Sa Look Scanned, JPEG (ZIP) ang pangalan ng option at .jpg ang extension ng mga file sa loob ng ZIP.

PDF: panatilihing magkakasama ang dokumento

Sa report o liham na maraming pahina, hindi na kailangang buksan ng tatanggap ang maraming image at alamin ang tamang pagkakasunod-sunod. Mas simple rin ang PDF kapag iisang upload slot lang ang form para sa buong dokumento.

Mga image ng bawat pahina ang laman ng PDF na ine-export ng Look Scanned. Hindi nito pinapanatili ang searchable text ng orihinal at hindi rin ito nagdaragdag ng OCR layer. Kung kailangang kumopya ng text o gumamit ng screen reader ang tatanggap, itago ang orihinal na digital PDF. Tingnan ang na-scan na PDF at editable na PDF para sa pagkakaiba ng mga ito.

JPEG: image ng bawat pahina na karaniwang mas maliit ang file

Magandang unang subukan ang JPEG kung humihingi ang upload form ng larawan ng bawat pahina o kung isang pahina lang ang ipapadala mo sa chat. Dahil sa lossy compression, karaniwang mas maliit ang color at grayscale scan sa JPEG kaysa PNG, pero maaaring magkaroon ng bakas ng compression sa maliliit na text at matutulis na gilid.

I-zoom in ang pinakamaliit na text bago magpadala. Walang silbi ang mas maliit na file kung hindi naman ito nababasa.

PNG: image ng pahina na walang lossy compression

Pinapanatili ng PNG ang mga pixel ng pahinang na-render na at hindi ito nagdaragdag ng bakas ng JPEG compression. Makakatulong ito sa maliliit na text o maninipis na linya, lalo na kung ilalagay mo ang image sa ibang dokumento at ie-export muli iyon.

Ang pagiging lossless ng PNG ay hindi nangangahulugang hindi nabago ang orihinal na dokumento. Na-render na ng Look Scanned ang pahina at nailapat na ang scan settings mo. Ang naprosesong resultang iyon ang pinapanatili ng PNG; hindi nito maibabalik ang detalyeng nawala dahil sa blur o mababang resolution.

Maaaring malaki ang PNG file, lalo na kung may kulay, texture ng papel, o noise ang pahina. Para sa pangkalahatang pagkakaiba ng compression, tingnan ang paghahambing ng JPEG at PNG ng Adobe.

Mag-export ng na-scan na PDF o ZIP ng mga image

1. Buksan ang Look Scanned, piliin ang dokumento mo, o gamitin ang built-in na halimbawa.
2. Ayusin ang itsura para magmukhang na-scan. Suriin sa preview ang maliliit na text bago mag-export.
3. Sa Output Settings, itakda ang Output Format sa PDF, JPEG (ZIP), o PNG (ZIP).
4. I-generate ang resulta at i-download ito.
5. Kung JPEG o PNG ang pinili, i-extract muna ang ZIP bago mag-upload ng isang image sa ibang lugar.

Para lang sa output ang format na pinili mo. Hindi ibig sabihin ng pagpili sa JPEG na JPEG din dapat ang source file: puwede kang magsimula sa PDF at i-export bilang mga image ang mga pahinang nilagyan ng scan effect.

Bakit ZIP ang dina-download at hindi JPG?

Maraming pahina ang puwedeng lamanin ng PDF. Isang pahina lang ang image na JPG o PNG. Sa ZIP, mada-download mo nang sabay-sabay ang lahat ng pahina, kahit iisang pahina lang ang dokumento.

Halimbawa, kapag nag-export ka bilang JPEG ng tatlong pahinang source file na report.pdf at itinakda ang filename suffix sa -scan, magiging report-scan.zip ang resulta. Nasa loob nito ang:

report-01.jpg
report-02.jpg
report-03.jpg

Pareho ang numbering ng PNG option, pero .png ang extension. Kapag binago mo ang filename suffix, pangalan ng ZIP ang magbabago; hindi ang pangalan ng mga image ng pahina sa loob.

Kung tumatanggap ng JPG o PNG ang form pero tinatanggihan ang download mo, tiyaking ang na-extract na image ang pinipili mo at hindi ang ZIP mismo. Pinagsasama-sama lang ng ZIP ang mga file para maipadala; hindi ito image format.

Kung marami ang source document mo, pareho rin ang mga output option sa Bulk Scan. Kapag sabay-sabay mong dina-download ang lahat ng resulta, inilalagay ang mga image ng bawat dokumento sa magkakahiwalay na folder sa loob ng iisang ZIP para hindi magkahalo ang mga pahinang magkapareho ang numero.

Kung masyadong malaki ang file

Isa lang sa mga salik ang format. May epekto rin ang resolution, laman ng pahina, at scan effects.

• Subukan ang JPEG kung tinatanggap ito ng tatanggap at masyadong malaki ang PNG mo. Suriin ang text sa aktuwal na laki bago magpadala.
• Bawasan ang resolution kung mas malaki ang image kaysa kailangan mo. Tiyaking nababasa pa rin ang maliliit na numero at punctuation.
• Bawasan ang noise kung pampaganda lang ito. Mas maraming image detail ang kailangang i-save kapag maraming detalye ang background ng papel.
• Para sa mga dokumentong puro text, subukan ang Black & White. Sine-save ng Look Scanned bilang 1-bit image sa PNG at PDF output ang mga black-and-white na pahina; maaaring mas maliit ang mga ito kaysa color scan. JPEG compression pa rin ang ginagamit ng JPEG sa mode na ito.

Walang iisang format na laging nagbibigay ng pinakamaliit na file para sa lahat ng dokumento. Tiyaking pasok sa size limit ng tatanggap ang na-download na file.

Subukan muna sa isang pahina

Pumili ng file at mag-export ng scan. Suriin ang preview, i-generate ang resulta, at buksan ang na-download para matiyak na tama ang itsura ng mga pahina at text.